Nach langem warte uf passends Wätter und glichziitig haubwägs verträglechä Temperature (Wasser & Luft) heimers ändlech gschafft! A däm wunderschöne Sunntig simer z erste mau die Saison ga böötle.
Wägem höche Wasserstang vor Aare (~290m³/s in Bärn), heimer üs entschide, d Saison nid mitem Klassiker Thun – Bärn, sondern Worbloufä – Wohlesee izweihe. Di Rute git d Müglechkeit, je nach Lust u Luune, chli z verlengere oder z verchürze. Das dank de verschindingste Usstigsmüglechkeite.
Da nid nume ig, sondern o grad viu angeri us üse Böötlikreise riisig bock uf ds erste böötle hei gha, simer grad mit drü Böötli agreist uf Worbloufe. Dr Chris het si Challenger 3 drbi gha, dr Fäbu u ig üse Seahawk 4 u ig sogar ds immer zueverlässigä Interdiscount Böötli.
Bevormer de los si, oder besser gseit churz nachdäm mir los si, hei natürlech nomau di wichtige Böötliregle müesse widerhout wärde. Vorauem wichtig, wüus doch o 2i Erstböötler drbi het gha.
Wägem vile Wasser isches de zimlech zügig vorwärts gange u mi het o paar mau chli hektisch müesse padle, da de ds uufer doch chli schneuer isch neecher cho aus mä het dänkt 🙈. Scho nach churzer Ziit simer bir “erste” Usstigsmüglechkeit bir Halebrüg verbii cho, usstige heimer aber no lang nid wöue, da mir üs ersch grad so wider ads böötle gwanet hei und no gar nid aui z Wasser vo naachem gseh gha hei.
Apropos Wasser: Es isch grad so 17 °C gsi und doch eher no chli miuchig 🥛.
Mit chli verspätig hets de o no ds fasch obligatorische “Wasser im Boot” gä. Zu mim erstuune hets sogar o so haubwägs guet funktioniert.
Churz vor em Stägmattstäg z Hingerchappele hets natürlech üses traditionelle Böötliselfie gä, bevor mir de o dä “zwöit” Usstig hei lasi und uf ds Ganze bis i Wohlesee si gange. Usnahmswiis hets üs uf däm Abschnitt nid fasch wider flussufärts gwinded, wüus bis zur Wohleibrügg no zimlech Strömig het gha. Das passiert o nume bi viu Wasser 🌊.
Dert isch di gar nid mau so längi Böötlifahrt fertig gsi. Ds guete ar Wohleibrügg isch, dasme dert bim Boge 17 Glacene cha choufe, fr ds Böötlierläbniss no richtig abzrunde. Ds schlächte ar Wohleibrügg isch, mi het ä verhäutnissmässig lange Wäg zum zrüg uf ds ÖV z cho.
Aues i Auem isches aber äs sehr glungnige we nid o usserordentlech spääte Saisonstart gsi. Abgseh vom Handy vom Fäbu wo chli badet het 🙈.