Nachere lange Durststrecki ischs am Sunnti wiedermau so wit. Mir gö ga böötle! U mitere länge Durststrecki meini eigentlech dr haub Summer. Sitem Saisonstart am 13. Juni hets bis ids, Mitti Ougste kes Böötliere meh gä 🙁
Bis ids het z Aarewasser meh wie usem Bschüttfass usgseht. Dr Aare-Wasserpegu isch wieder gnue wit abegsunke, so dasmes cha wage. Lut aare.guru füehrtsi o keni Boumstämm me u dr Abfluss isch mit 183m3/s immerno ganz gäbig, aber nüt meh im vrglich zum Rekord vo 550 m3/s!! D Temperatur isch guet bebadbar mit 19.9°C.
Am 10ni bir iböötlisteu z stäffisburg hets no fasch keni Lüt. Düfür hets öppe 7 grossi Mietboot wo no ufene ladig Lüt warte.
D Polizei macht vor Ort no ä Informationskampagne über Böötlisicherheit. Mä söu doch bitte Schwümmweste trage u z Gummiboot mit Name u Adrässe aschribe.
Böötli ufpumpe, Sunnegäcremä ischmiere u ab id Aare. Üse Plan ischs, dasmer bis is Eicholz böötle und när dert no düe brätle u dr Nami vrbringe. Sunne, Wasser u im böötli plegere mitemne Bierli. Was wotsch no meh?
Befors z gmüetlech wird, chunnt aber de oh scho z Vorspiu vor Uttigerschwelle. Dert isch z Wasser chli ufgwüehlter aus süsch. Mir träffe Vorbereitige für d Schweue. Letschti Aareseck am Boot amache, Chips vrrume u ds Bier am Bierhalter*in abgä.
Leider simer chli spät dran gsih mitem parat mache. Wäg däm simer nid perfekt mittig über die grosse Wäuene abegfahre. Üses Böötli het es paar grossi Gütsch Wasser abbecho. Z angere Böötli het no chli meh Päch gha und es hets gkehrt. Aui 3 Insasse si im Wasser glandet, heisech aber no am Böötli chönne häbe. Zum Glück isch nid meh passiert..!
Vrlüst heimer aber glich gha. Dr Böötlitransportierwage isch ungergange, 3 Bier si ir Aare vrschwunde u üses Brot isch ä nasse Chlumpe worde. D Schwän hei aber sicher freud dran, ah üsem U-Broot.
Nachdäm dasmer üses Zügs wider tischelet u büschelet hei, die nasse Chleider zum tröchne usgleit hei, heimer de dr Räst vor Fahrt no chönne gniesse.
Z usboote im Eicholz isch oh no tricky gsih, da d Strömig vor Aare scho no starch isch. Nachdäm mir dert acho si, heimer üs äs Füürli agschlosse u dert gmüetlech brätlet. Ab und zue simer no id Aare ga schwümme, wes üs z warm isch worde. Gäge Abe simer de wieder heizu gange.
Fazit nach däm Böötle:
Immer guet ufpasse u d Aare nid ungerschetze. Äm Wasser ischs glich obme die Route scho X-mal abeböötlet isch oder ni.