Im Ougust bini stat mitem Gummiböötli uf dr Aare, ufem Meer mit Fährenä am Böötle bi gsi. Drum hani ghofft, dass ds Wätter, img Gägesatz zum Juli, im Septämber mitspiut. Und siehe da, 25°C Luft und 18°C Wasser. Aber nume 93m³/s Wasser… Muess Länge!
Mir hei zum ne Aabeböötle am 6i agsetzt. Si am haubi 6i z Worbloufe gsi u effektiv churz vor de 6i scho Ungerwägs. Sehr speditiv ouso wis nume mitemne chliine Böötli wi em uuraute Interdiscount-Böötli vo mir müglech isch.
Da scho Septämber isch und mir necher ar Tag u Nacht gliichi si aus am lengste Tag isch haut d Sunne scho entsprächend töif gsi. Ds het de drzue gfüehrt dases bau meh chaut aus isch gsi. Mir si ouso nume churz am aafang ga bädele u heis de speeter lasii.
Dr ds wenige Wasser simer chuum vorwärts cho u es het teune Orte regurächt Stromschneuene gä. D Aare het teune Orte irgendwie meh ad Ämme erinneret aus ad Aare.
Ufreund vom langsame Tämpo und er Mangelnde Sunne heimer üs de entschide scho bim Feusenou use z gah und nid wi plaant zur Halebrüg oder gar zum Stägmattstäg in Hingerchappele z Böötle.
Fazit: Es Aabeböötle im Septämber isch nid sone gueti Idee. Drfür muesme ganz wörtlech chli früecher ufstah u o früecher Fürabe mache. D Rute vo Worbloufe het sehr viu höchi Böim ar Aare und git ganz viu Schatte. Dr Septämber het ouso sini Limitatione 😬.