Dr Saisonstart isch das Jahr doch immer hin scho im Mai. Ouso biz früecher aus im Vorjahr. Natürlech heimer üs fre absolut Klassiker entschide Thun-Bärn. Oder gnau gnoh Schwäbis bis Marzili.
Womer churz nach de eis ds Schwäbis bim Böötli-istigs-hotspot si aacho hets no fasch ke böötli gha. Das isch wahrschinlech zum eine dranne glägge, das im Mai nonid so viu ads Böötle dänke u zum angere, dass me am 12i normalerwiis grad vorem grosse Asturm no dürechunt.
Mau drinne isches de mit 180m³/s Wasser ganz gäbig vorwärts gange. Z Wasser isch gnue warm zum Bade gsi aber dr Wind hets bim wider use cho chli früsch gmacht.
Nachder überstandnige Uttigerschweue, ischs de meh es gmüetlechs Böötle worde u es isch nid viu Wäutbewegends passiert. Ussert dass dr Chris sini Sunnebrüue unabsichtlech (oder doch absichtlech 🤔) modifiziert het. Drbi isch ömu klar worde, dass ds Brüuegsteu wück us Houz isch 😅.
Es isch richtig schön gsi e Saison wider aständig früech chönne azfah, o we die erste paar mau doch biz früsch chöi si. Aber he! Mir wei nid klage! Zum Abschluss heimer no biz Slackliner zuegluegt wos chli überdurchschnittlech im Griff hei. Jedefaus ig hät scho nume Schiss us dere Höchi (vom Obere Slackliner) ids Wasser z gumpe 🙈.
