Scho paar täg vorhär heimer akündet, dasmer am Sunntig 17. Juli wei ga böötle. Die früechi Akündigung het sech gloub glohnt, da mir dasmau sehr zauriich si gsi. Ganzi 10 Stück. Da aber momentan nid ganz so viu Böötli im Kollegekreis zur Verfüegig stöh und dr Chris wäge böötle uf chli grössteem Wasser (Ferie nenntme ds gloub 🤔 ) abwäsend isch, hets kreativi Ideene brucht. Näbst em scho gwohnte Seahawk4 hets ono ds Interdiscountböötli und zwöi Stand-Up Paddle Boards (SUPs) brucht. Aber so hets fr aui gnue platz gha. Angerersiits wärs mit bis zu 21°C im Wasser ja o nid grad mega chaut gsi zu chli am stat im Böötli umezhänge.
Am haubi 2i heimer üs z Worbloufe troffe u si de nachere augemeine ufpump und pack Session äuä churz nach de 2i id Aare. Dr Istigsbereich in Worbloufe isch das Jahr im Umbou und nume über ei Stäge müglech. Ab nächst Jahr söts de Wunderschöni (oder so) Bettostäge u Rampi u aues mügleche gä. Vilech ono paar Böim.
Unger üsne 10 Böötlerinne u Böötler, beziehigswiis SUPlerinne u SUPler, hets o zwöi Gest us Finnland gha 🇫🇮. Mangels SUP-Erfahrige ufemne Fluss hets di beide de ir erste Kurfe grad mau ine Boumstamm tribe und si hei di ersti unfreiwiuigi Badesession gha 😅. Es isch aber niemmerem öppis passiert und ds Böötle/SUPle isch wiitergange.
Dr Räst vor Fahrt verbii am Schlössli in Richebach ar Brauerei im Feusenou 🍻 bis zum Stägmattstäg in Hingerchappele, isch de rächt ruhig verloffe. Es het ja mit 130M³/s o chum Wasser gha. D SUP, wo natürlche viu wändiger u schneuer si, si immer chli um d Böötli umekreiset u ab und zue cho verpflegig bide Böötli hole. O Änteli hei versuecht chli Verpflegig z becho 🦆.
Aues i auem es sehr gmüetlechs u agnähms böötle. Perfekt fr ne heisse Sunntig im Summer 😎 .