Nachere doch eher länge Pouse heimer eher spontan hüt ga böötle wöue. Knappi 2h vorbereitigsziit hei drzue gfüert, dass mer nume ds viert si gsi. Aber ds passt grad supper ines einzigs Böötli. Dasmau dr Seawhak 4.
Am haubi 2i heimer üs z Worbloufe troffe u si de öppe am 2i im Wasser gsi. Oder besser gseit ufem Wasser. Dr Istig Worbloufe isch das Jahr leider zimlech es Downgrade im gägesätz zu de letschte Saisons, wüu grad Umbouarbeite im Uferbereich im Gang si (Siehe ittigen.ch – Aareraum Worblaufen – Aufwertung). Es git aber no ei Stäge wome zum Istig cha bruche. Mega gäbig isches aber nid.
D Fahrt isch bi 160m³/s mega gmüetlech gsi u es isch nid wück viu nennenswärts passiert. Eifach gmüetlech böötle 🚣, ässe 🥪, trinke 🍺 und bade 🏊🏼. Bi 20°C Wassertämperatur isches natürlech fr niemer z chaut gsi zum ga bädele.
Ds Hingerchappele isch de z Ändi vo üsere Tour gsi. Vor Sunne, em Wasser u em Böötle genereu erschöpft u glichziitig erhout isches ä erfougriiche Sunntig gsi.