Ab 13°C Aarethämperatur isch di inoffizieui Mindesttämperatur fr z Böötle erreicht u mi cha d Saison offizieu eröffne.
Zmingst hetsech ds i de letschte Saisons so etabliert. 13°C isch zwar scho sehr chaut fr z bade, aber we ds Wätter passt de isches meisstens immerhin fr di notwändige Aaregäng wärendem böötle gnue warm. (Ussert während em 2019 Saisonstart wos ärnsthaft ä Pinkelpause brucht het 🤔.)
Wäge ziitleche Ischränkige isch dr Saisonstart 2023 di verchürzti Route ab Uttige bis Bärn gsi. Und wüu nid so warm, ungerder Schweue z Uttige 😉.
Nume ds dritt isches eher ä chliini Rundi gsi, aber drfür ä gmüetlechi. Wobis churz chli ungmüetlech isch worde, womer ä Stei unger Wasser ä chli spät hei gseh u de no im Ifer vom Gfächt – oder eher im Ifer vom Paddle – gäge Zug vom Wasser hei dran wöue verbi paddle. Am Stei uswiche heimer nümme chönne, aber im letsche momänt no einigermasse dr Spitz dri träie, so, dasmer nume Wasser im Boot hei gha unds üs nid het träit oder so.
Apropos “Wasser im Boot”: Di eigentlech wichtigi Üebig “Wasser im Boot” heimer hüt us Thämperaturgründ usglah.
Es isch mit bis zu 27.5°C zwar eigentlech warm gsi, aber es het gwindet uf dr aare wases o ohni Nass z si eher chaut gmacht het gha.
Mit dere fahrt isch dr Seahawk 4 offizieu i di 4ti Saison gstartet. Mit etleche Flicke – aui chli ar gliiche Schwachsteu – isches bide letschte Fahrte immer chli äs zocke gsi, ober izze äch wider am ne Ort rünnt. Und ja, dasmau isches dr inner Ring wo grünnt het. Nid dramatisch, aber so, dasmer ä churze Zwüschestopp hei igleit fr chli nachezpumpe. Mau luege wie u obmers no chöi flicke.
D Fahrt säuber isch abgseh vom Stei rächt gmüetlech aber o chaut gsi. Dämentsprächend weni Bademinute hets gäh, aber es isch ä glungnige Start id Saison 2023 gsi. O we ds Materiau ir Form vom Seahawk 4 langsam chli nachegit.