Hüt hei mir i Gnuss dörfe cho bi üsne Fründe is Boot ufgno z wärde und di gmüetlechi Strecki Worbloufe – Hingerchapelle z begah. Dr Wätterbricht het gäge Aabe es potentiells Gwitter verkündet, drum isch dr Vorschlag gsi, scho am 11i d Leine loszlege. Mit em mittlerwile meh aus 7 jährige Interdiscountböötli, em Challenger und em SUP si ungerangerem es paar Snäcks, e Gast us dr Innerschwiiz und zwöi Gascho Bier mit an Bord gsi. Ds einte vo dene zwöi Gascho isch uffalllend grüen gsi und missbilligend als Farmer Bier abgstämplet worde. Bimne gnauere Blick hetsechs jedoch aus Naturaplan Lager enttarnt, was gschmacklech schono e zimleche Ungerschiid isch. Di Mitfahrende hei de das doch eher aus schlächts Marketing vor Appenzeller Brauerei igstuft. Nachem eher ahsträngende Ufpumpe undemne chline zwüschefau bim SUP wo e Fädere het gchlemmt, aber d Tüftler mitem Sackmässer hei chönne löse, isches de losgange. Ds Wasser isch eher ruhig gsi und me het nur vereinzelnt es paar Padelschläg müesse gä zum korrigiere. Di erfahrne Böötlischte hei sogar d ahzau Padelschleg wos het brucht chönne vorussäge – fasch wie dr Navigator bim Rally isch eim das vor cho.
I Ufernöchi hets zimlech Lüt gha, mir si üs einig gsi, das mir uf dr ganze Fahrt um die 300 Lüt hei gsichtet. Uf dr Aare aber isches rächt überschoubar gsi. Nach ungfähr eme drittu vor Strecki hets de oscho bitzli Wasser im Boot gha und ds obligate Mann über Board isch ahgstande. Nach dere churze Erfrüschig hets e churzi Diskussionsrundi gä, dass eigentlech es genderneutrals Person über Bord ahbrachter wär.
Bir Ihfahrt i Wohlesee hetsech usegsteut, dass weme d Luftmatraze as SUP ahseilet, zwar funktioniert, ds Navigiere aber eher vor Matraze us chunnt weder vom SUP, wo ja eigentlech ds Padel het. Im augemeine isch die Fahrt fridlech verloffe u me het d Flinte nid is Chorn müesse wärfe (ugs. Ds Paddel is Schiuf wärfe). Dr Versuech ds Öpfubütschgi is Gebüsch z wärfe isch aber gschiteret und das blöde Bütschgi hetnis wider ihghout. So hets nomau e zwöite Versuech brucht.
Im Wohlesee ahcho hetme weue usefinge, ob me ou ds dritte ufe Pfiler cha stah. Obwous chli gwaggelet het, isch ds doch tatsächlech müglech gsi u mir hei dä neu Rekord uf Bild chönne festhaute (Knapp erkennbar aber Wahr: wo dr Pfiu härezeigt, versteckt sech no e dritti Person).
Z Ahlege het bestens funktioniert. Für di sanitäri Entspannig ischme bim ahligend Campingplatz fündig worde – e Gheimipp für witeri Toure.
Somit isch ou die Fahrt, für 2 vo 6 d Jungfernfahrt und d Aare-Erstbebadig i däm Jahr, erfougriich über d Bühni und zum Glück nid über Bord.