Dr absolut Klassiker zum Aareböötle isch Thun (ouso Schwäbis) bis Bärn (Marzili oder Eichhouz). I üsem Fründeskreis wird aber fasch so viu d Strecki vo Worbloufe bis Hingerchappele (oder sogar Wohle weme lenger möcht) beböötlet. Vilech jeh nach Saison sogar meh. 2023 isches bishär zmingst klar mit 3 zu 1 ligt Worbloufe-Hika klar vor Thun-Bärn.
Dä Sunntig isch ä perfekte Tag zum Böötle gsi. Am 12i heimer üs z Worbloufe troffe, hei über d Bousteu ar Aare irgendwo ä Wäg zur Aare gfunge u si speditiv los. Wobi speditiv relativ isch und aui gfüeut 15min uf mi gwartet hei mit fertig sunnegremele. Immerhin sis nume 2i wartendi gsi hüt.
Da dr Seahawk 4 momentan no bizli rünnt, isch widermau ds Interdiscount Böötli zum Zug cho. Bi 18.5°C Wassertämperatur hets o ke Angst vorem chaute Wasser gä u dr Gäbu isch gloub so zimlech di ganzi Fahrt ufere Luftmatratze gsi. Vilech heter o eifach em uuraute Interdiscount Böötli nid vertrout 🤔.
Ds Wasser isch im Verlouf de no uf 20°C uche gstige u mir si knapp ade 30°C Lufttämperatur verbii (29°C). Wasser hets mit ~170m² so “normau” viu gha. Super Zahle ouso 😉.
Mir heis üs natürlech nid la näh wider ufe scho fasch berüemt Pfoste z Hingerchappele z chlättere u es Biudli z mache. Usnahmswiis simer aber no chli wiiter aus zum übleche Usstigspunkt am Stägmattstäg gange. Nämlech ungloublechi 400m wiiter zur Kappelebrügg. Dert bi ig 2019 z letscht mau use. Eher unfreiwiuig, wüus üs denn währendem Böötle verhaglet het 😯. Dasmau hets kes Azeiche vo Hagu gha und o ke Wuuche am Himu, drfür isch d Usstigssteu zimlech Zuegwachse.
Nachemne churze Usflug id Dorne am Rand grad ob dr Brügg, heimer de grad ungerem Pfiler chönne alegge. Fr eis Boot längts, aber es isch scho eher äng u drzue no steil. Z nächste mau gömer äuä de wider bim Stägmattstäg use 😉.
